Friday, December 15, 2017

KAULI YA UPENDO PENEZA KUHUSU SUALA LA WABUNGE KUHAMA CHAMA NA KUFANYA MARUDIO YA UCHAGUZI



CHAMA CHA DEMOKRASIA NA MAENDELEO (CHADEMA) TAARIFA KWA VYOMBO VYA HABARI

CHAMA CHA DEMOKRASIA NA MAENDELEO (CHADEMA)  TAARIFA KWA VYOMBO VYA HABARI

Chama cha Demokrasia na Maendeleo (CHADEMA ) leo tarehe 14 Disemba,2017 tumepokea taarifa kupitia mitandao ya kijamii kuwa Mbunge wa Siha Dr.Godwin Mollel amejiuzulu uanachama na kujiunga na CCM .
Dr. Godwin Mollel ameeleza sababu ya uamuzi wake huo ni kutaka kulinda rasilimali za Taifa.

Sababu hii aliyoitoa ni ya kushangaza kwani Bunge ndicho chombo chenye wajibu wa kusimamia na kulinda rasilimali za Taifa kwa niaba ya wananchi.

Ni jambo la kushangaza kwa kuwa kitendo chake cha kulikimbia Bunge kama chombo cha kusemea na kutetea rasilimali za Taifa na kuja uraiani inatoa taswira gani maana kalikimbia Bunge lenye wajibu huo kwa mujibu wa Katiba na Sheria za nchi yetu.
Tunawashauri wale wote ambao wanajitoa waeleze sababu halisi na sio kuhadaa umma kwa sababu uchwara kama hizi, maana wapo wanaosema wanaacha kazi kwenda kuunga mkono dhana ya 'hapa kazi tu' na wengine wanasema wanaenda kuunga mkono juhudi za kuboresha maisha kwa kuacha kazi.

CHADEMA tuko imara sana na tutaendelea na ajenda zetu bila kuyumbishwa na wimbi hili la watu wachache ambao wameamua kuwasaliti wapiga kura wao kwa kutoa sababu zisizo za msingi ambazo hazina maslahi kwa Taifa bali kwa maslahi yao binafsi . Huu ni ubinafsi wa hali ya juu.

Tutaendelea kujenga Taifa letu na Chama chetu bila kujali njaa za baadhi yetu wala maslahi ya watu wachache. Ila kwa hakika ni kuwa wale wenye dhamira thabiti ndio wataweza kufika mwisho wa safari ya kuleta mabadiliko salama. Ni dhahiri wale waliotanguliza ubinafsi hatutaweza kufika nao mwisho wa safari hii.

Imetolewa leo Alhamis 14 Novemba, 2017

JOHN MREMA

Mkurugenzi wa Itikadi, Mawasiliano na Mambo ya Nje.

Tuesday, December 12, 2017

MSIMAMO WA UKAWA KUHUSU HALI YA KISIASA NCHINI NA USHIRIKI WA CHAGUZI MBALIMBALI ZINAZOENDELEA




MSIMAMO WA VYAMA VYA CUF, NCCR -MAGEUZI, CHAUMMA, NLD NA CHADEMA KUHUSU MWENENDO WA HALI YA KISIASA NCHINI NA KUSHIRIKI UCHAGUZI MDOGO WA MARUDIO WA TAREHE 13 JANUARI, 2018.

MSIMAMO WA VYAMA VYA CUF, NCCR -MAGEUZI, CHAUMMA, NLD NA CHADEMA KUHUSU 
MWENENDO WA HALI YA KISIASA NCHINI NA KUSHIRIKI UCHAGUZI MDOGO WA MARUDIO WA TAREHE 13 JANUARI, 2018.


UTANGULIZI


Serikali ya awamu ya tano imeonyesha wazi kuwa haiko tayari kufuata Katiba na Sheria za nchi katika utendaji wake wa kazi. Iimejipambanua wazi kuwa haiheshimu demokrasia. Haki za Binadamu zimeendelea kuvunjwa na serikali na vyombo vyake. Hakuna hatua zozote zinazoonekana kuchukuliwa kudhibiti hali hii.

Baadhi ya vitendo ambavyo vimeonyesha wazi kuwa kuna ukiukwaji wa Katiba na Sheria za Nchi ni pamoja na vifuatavyo;

i. Kupiga Marufuku Mikutano ya Vyama vya Siasa:

Serikali ilipiga marufuku vyama vya siasa kufanya mikutano ya kisiasa mpaka mwaka 2020. Huu ni uvunjaji wa Ibara ya 20 (1) ya Katiba ya Jamhuri ya Muungano wa Tanzania. Aidha, katazo hilo linakiuka Sheria namba 5 ya Vyama vya Siasa ya mwaka 1992 ambayo imetoa haki kwa vyama vya siasa kufanya kazi ya siasa.

ii. Mauaji, unyanyasaji na uonevu unaofanywa dhidi ya viongozi wa vyama vya upinzani:

Uonevu na unyanyasaji dhidi viongozi wa kisiasa wa vyama vya upinzani unaendelea kufanywa kwa kuwakamata, kuwaweka rumande na kuwafungulia mashtaka mbalimbali ya kubuni na kubambika viongozi hao, huu ni mkakati wa kuwafunga midomo wapinzani wanapotekeleza jukumu lao la msingi la kuikosoa Serikali. Aidha wapo ambao wameshambuliwa kwa lengo la kuuwawa (Tundu Lissu), wengine wamepotezwa na mpaka sasa hawajulikani walipo (Ben Saanane) na wengine wameuawa kikatili (Alphonce Mawazo) na wengine wanaendelea kushambuliwa maeneo mbalimbali ya nchi yetu.

iii. Uchaguzi kugeuzwa uwanja wa vita, badala ya kushindanisha hoja na sera za vyama na wagombea

Tumeshuhudia chaguzi za marudio zilizopita kwenye kata 43 zikiendeshwa bila kufuatwa kwa sheria, taratibu, kanuni na maadili ya uchaguzi, bila hatua zozote kuchukuliwa kwa wahusika. Badala yake viongozi wa vyama vyetu wameendelea kukamatwa na kufunguliwa mashtaka kwenye mahakama mbalimbali na wengine wapo mahabusu za Polisi mpaka sasa.

Aidha, viongozi wetu kwenye kata hizo walishambuliwa kwa mapanga na wengine mbele ya Polisi na hakuna hatua zozote zilizochukuliwa dhidi ya wahalifu hao, badala yake walikuwa wanalindwa na Polisi ili kutimiza uhalifu wao huo.

iv. Mauaji na watu kupotezwa

Kumekuwa na utamaduni mpya ambapo sasa wananchi wanauawa na miili yao inaokotwa ikiwa ama inaelea baharini au maeneo mbalimbali ya nchi, ikiwa imewekwa kwenye sandarusi na hatuoni Serikali ikitoa taarifa yeyote rasmi kuhusu mauaji hayo.

Aidha kumeibuka utamaduni wa watu kutekwa, kuteswa na kupotezwa na watu wanaoitwa ‘wasiojulikana’. Ahadi ya Serikali kuwabaini watu hao ‘wasiojulikana’ hadi sasa hazionekani kuzaa matunda, hali inayopelekea kujenga imani kuwa ‘wasiojulikana’ hao, wanajulikana kwa baadhi ya vyombo vyetu vya ulinzi na usalama na kwamba kuna mkakati maalum wa kuwalinda.

v. Vyombo vya habari kuminywa

Tumeshuhudia vyombo vya habari nchini vikiendelea kuminywa na vingine kufungiwa kwa sababu tu vimekuwa na ujasiri wa kuikosoa serikali. Hali hii imeenda mbali zaidi sasa tunashuhudia waandishi wa habari wakitekwa na kupotezwa (mf; Azory Gwanda) na hakuna taarifa rasmi za kufuatilia kwa kina jambo hili.

vi. Matukio ya aibu katika uchaguzi kata 43

Tume ya Taifa ya Uchaguzi imetangaza uchaguzi mdogo wa marudio katika majimbo ya Longido,Singida Kaskazini , Songea Mjini na Kata sita ambao utafanyika tarehe 13 Januari,2017.

Itakumbukwa kuwa Tume ya Taifa ya Uchaguzi ilitangaza kufanyika kwa uchaguzi wa marudio katika kata 43 mnamo tarehe 26 Novemba ,2017. Uchaguzi huu ulifanyika bila ya kufuata misingi ya sheria, kanuni na maadili ya uchaguzi,baadhi ya matukio hayo ni kama ifuatavyo;

• Mawakala walitolewa nje ya vituo vya kupigia kura; hili lilifanywa kwa ushirikiano baina ya polisi na wasimamizi .

• Vituo kuvamiwa wakati wa kuhesabu kura; vituo vya uchaguzi vilivamiwa na watu wa CCM na kuharibu zoezi la kuhesabu kura. Matokeo katika baadhi ya vituo yalibadilishwa kwa nguvu.

• Fomu za malalamiko; mawakala wetu walikataliwa kujaza na wale wachache waliojaza hawakupewa kabisa nakala za fomu husika

• Umwagaji wa damu; Viongozi na wanachama wetu kuvamiwa na kujeruhiwa vibaya kwa silaha mbalimbali yakiwemo mapanga, marungu na fimbo.

• Viongozi wa Serikali wakiwemo Wakuu wa Mikoa na Wilaya; kuingia kwenye vituo vya kupigia kura wakati hawaruhusiwi kwa mujibu wa sheria ya uchaguzi

• Wasimamizi wa uchaguzi; walifanya hujuma za wazi kama vile kuwanyima barua za viapo mawakala wetu,kuwazuia wagombea wetu kufanya kampeni na kuwaengua wengine bila kufuata taratibu.

• Matokeo halisi kutokutangazwa; wasimamizi wa uchaguzi waliamua kutangaza matokeo ya uongo na kuipa CCM ushindi pamoja na fomu zote kuwepo zinazoonesha kuwa vyama vya upinzani vimeshinda.

MAANA YA MATUKIO HAYA

1. Hakuna tena uchaguzi utakaofuata sheria ,kanuni na taratibu zilizopo.

2. Tume ya Taifa ya uchaguzi imekosa uhalali wa kuendelea kusimamia chaguzi .

3. Jeshi la polisi wameonyesha wazi kuwa wapo upande wa CCM na hata tuliporipoti matukio mbalimbali hawakuchkua hatua.

4. CCM kwa kushirikiana na serikali yake hawako tayari kutangazwa kuwa wameshindwa kwenye uchaguzi.

5. Wasimamizi wa uchaguzi wameonyesha dhahiri kuwa wao ni CCM.

6. Ofisi ya Msajili wa Vyama vya Siasa imeshindwa kusimamia kikamilifu haki ya vyama vyote vya siasa na sasa ni dhahiri imeegemea upande mmoja wa kulinda CCM na Serikali yake dhidi ya vyama vya upinzani!

HITIMISHO.

Itakumbukwa kwamba, kwa nyakati tofauti kabla ya uchaguzi wa marudio wa Novemba 26, tayari kumekuwepo na kauli za maelekezo kutoka kwa Mwenyekiti wa CCM, Rais Dkt. John Pombe Magufuli kwa Wakurugenzi wa Halmashauri na Manispaa ya kwamba hatamwelewa Mkurugenzi atakayemtangaza mgombea wa chama cha upinzani kuwa mshindi. Kauli hiyo imethibitika katika uchaguzi huu wamarudio wa kata 43 uliomalizika hivi karibuni.

Uchaguzi unapokosa kuwa huru, wa haki na halali, unajenga chuki na mfarakano mkubwa katika taifa. Kuendelea kushiriki chaguzi zenye viashiria vyote vya ubatili ni kujenga misingi ya ubatili katika Taifa.

Vyama vya siasa hujengwa na kuimarika pale vinapofanya shughuli zake za kisiasa wakati wote. Kufungia/kuzuia vyama kufanya shughuli zake kihalali na kisha kuviruhusu tu kushiriki uchaguzi ni sawa na kuingiza timu katika mashindano bila mazoezi.

Umoja wetu unaamini kuwa uchaguzi uliotangazwa kufanyika Januari 13, 2018, hauna sifa kuendelea bila kwanza wadau wote, kwa maana ya Vyama vya Siasa, Tume ya Uchaguzi, Msajili wa Vyama vya Siasa, Vyombo vya Ulinzi na Usalama na wadau wengine wowote, kukaa meza ya pamoja na kutafakari njia bora zaidi ya kuendesha chaguzi katika awamu hii ya tano.

Ni rai yetu kwamba uchaguzi huu UAHIRISHWE ili kutoa nafasi hii. Kama Tume ya Uchaguzi ya Taifa (NEC) na Serikali hawatakubaliana na RAI hii, umoja wetu wa vyama tajwa, HAUTASHIRIKI uchaguzi uliopangwa kufanyika Januari 13, 2018.

Kwa upande mwingine, umoja wetu utaendelea na jitihada za kudai TUME HURU, KATIBA MPYA na UTAWALA UNAOHESHIMU KATIBA, SHERIA NA HAKI ZA BINADAMU, kupitia majukwaa mbalimbali. Ndani nan je ya nchi, ikiwemo mahakama.

….……………………..

MHE.JULIUS MTATIRO

M.KITI KAMATI YA UONGOZI –CUF

…………………….

MHE. FREEMAN MBOWE

M.KITI –CHADEMA

……………….

MHE. HASHIM RUNGWE

M.KITI –CHAUMMA

…………………..

MHE. DANDA JUJU

KATIBU MKUU –NCCR –MAGEUZI

…………………….

MHE. TOZY MATWANGA

KATIBU MKUU –NLD

Friday, December 8, 2017

Tundu Lissu: Polisi wa Tanzania hawana mamlaka ya kunihoji nikiwa Kenya au kwingineko nje ya mipaka ya Tanzania


Ndugu zangu Watanzania. Salaam za upendo na shukrani kwenu wote.

Leo ni mwezi wa tatu tangu kufanyika kwa jaribio la kuniua la tarehe 7 September.

Tangu siku hiyo, nimetembelewa na mamia ya Watanzania na watu wengine kutoka nchi mbali mbali duniani.

Nimeombewa sala na mamilioni ya Watanzania na watu wengine wengi kutoka nchi nyingine walioguswa na tukio hili.

Nimetembelewa na Makamu wa Rais wa Jamhuri ya Muungano, Rais mstaafu Mzee Ali Hassan Mwinyi na viongozi wengine wa serikali ya Kenya na taasisi zake; pamoja na wabunge wa Tanzania na wa Kenya, majaji na wanasheria wa nchi mbali mbali, n.k.

Hata hivyo, hadi sasa Jeshi la Polisi la Tanzania halijataja linamshuku nani kuhusika na kitendo hicho cha kigaidi.

Hadi sasa Mwanasheria Mkuu wa Tanzania hajamwomba Mwanasheria Mkuu mwenzake wa Kenya ruhusa ya mimi kuhojiwa na Polisi wa Kenya juu ya shambulio hilo kama inavyotakiwa na sheria husika za nchi yetu.

Polisi wa Tanzania hawana mamlaka ya kunihoji nikiwa Kenya au kwingineko nje ya mipaka ya Tanzania.

Hadi sasa Bunge la Tanzania na uongozi wake haujachukua hatua yoyote ya kunitembelea hospitalini nilikolazwa wala kunihudumia kwa namna yoyote ile.

Sheria ya Uendeshaji wa Bunge inasema ni wajibu wa Bunge kumhudumia mbunge kwa matibabu na huduma nyingine anapokuwa hospitalini ndani au nje ya Tanzania.

Kwa kila namna, ninauguzwa na chama changu, Watanzania na watu wengine kutoka sehemu mbali mbali duniani kwa michango yao, sala zao na mapendo yao kwangu. Nawashukuruni sana na Mungu wetu awabariki sana.

Mambo yote haya yanatilia nguvu hoja yetu juu ya ulazima wa uchunguzi huru wa shambulio hili la kigaidi. Likiachiwa kwa serikali ya Tanzania peke yake ukweli hautakaa ujulikane.

Ninaendelea vizuri na matibabu na madaktari watakaposhauri nitaanza hatua nyingine ya matibabu yangu.

Mungu ni mwema, nitasimama na kutembea tena. Nitarudi nyumbani ili kuendelea na kazi ambayo imempendeza Mungu kuokoa maisha yangu ili niweze kuitenda.

Kumekuwa na matukio mengi ya kutisha kama hili na mengine mbaya zaidi. Nchi yetu inahitaji ukombozi ili maovu haya yakomeshwe kabisa. Hili ni jukumu letu sote tunaojiona kuwa wazalendo halisi wa Tanzania.

Nawashukuruni sana na Mungu wetu awabariki sana.

Tundu AM Lissu (MB)

The Nairobi Hospital, Kenya

CHADEMA YAJITOA KWENYE TIMU YA BUNGE INAYOSHIRIKI MICHEZO YA EALA

CHAMA KUWAAGIZA WABUNGE WAJITOE KWENYE TIMU YA BUNGE MICHEZO YA EALA

Kamati Kuu ya Chama cha Demokrasia na Maendeleo (CHADEMA) inayokutana jijini Dar es Salaam tangu jana Jumatano, katika kikao cha dharura, pamoja na masuala mengine, imeendelea kutafakari kwa kina mwenendo wa hali ya kisiasa nchini.

Kipekee katika agenda hiyo, Kamati Kuu baada ya kupokea taarifa na tathmini ya kina ya uchaguzi wa marudio katika kata 43 uliofanyika hivi karibuni, ambao ulitawaliwa na uvunjifu mkubwa wa haki za binadamu, vitendo vya kinyama dhidi ya ubinadamu na ukandamizwaji mkubwa wa misingi ya demokrasia na utawala bora, kinyume cha sheria za nchi yetu, vyote hivyo vikilenga kuharibu uchaguzi na kupora matokeo tofauti na matakwa ya wapiga kura;

Na baada ya kujiridhisha kuwa vitendo hivyo vimefanyika kwa makusudi, vikilindwa au kunyamaziwa na mamlaka za kiserikali zenye wajibu wa kusimamia taratibu za uchaguzi, vikiwemo vyombo vya dola, lengo ikiwa ni kutaka kuua siasa za ushindani wa vyama vingi na kipekee kuishughulikia CHADEMA, wanachama, wafuasi, mashabiki na viongozi wake;

Kwa kuzingatia pia misimamo ambayo imekuwa ikioneshwa na chama kilichoko madarakani, wakiwemo viongozi wake na hata wabunge katika matukio ya kinyama yanayofanyika wazi kwa nia ya kuwadhuru wanaChadema, mathalani tukio la kushambuliwa kwa nia ya kuuwawa Mwanasheria Mkuu wa Chama na Mbunge wa Singida Mashariki, Tundu Lissu, ambaye pia ni Rais wa Chama cha Mawakili nchini (TLS), Kamati Kuu ya Chama imetoa azimio kwa kauli moja kuwa;

1. Wabunge wote wa CHADEMA ambao ni sehemu ya Timu ya Michezo ya Bunge la Jamhuri ya Muungano wa Tanzania, inayoshiriki michezo ya Mabunge ya Nchi za Jumuiya ya Afrika Mashariki (EAC) waondoke mara moja kwenye kambi ya timu hiyo.

2. Wajitoe rasmi kushiriki mashindano hayo ambayo mwaka huu Tanzania ndiyo nchi mwenyeji, yakifanyika jijini Dar es Salaam.

3. Kwamba maagizo hayo yanaanza kutekelezwa mara moja kuanzia usiku wa Jumatano, Desemba 6, mwaka huu, baada tu ya kupitishwa kwa azimio hilo, ambapo Kamati Kuu ilimwagiza Katibu wa Wabunge kuwafikishia wabunge husika maagizo hayo mara moja kwa ajili ya utekelezaji.

Maazimio mengine ya kikao cha Kamati Kuu ambacho bado kinaendelea jijini Dar es Salaam, yatatolewa katika hatua ya baadae kwa njia ambayo umma utataarifiwa rasmi.

Imetolewa leo Alhamis, Desemba 7, 2017 na;
Tumaini Makene
Mkuu wa Idara ya Habari na Mawasiliano
CHADEMA

Wednesday, December 6, 2017

KAULI YA CHADEMA KUHUSU KUHAMIA CCM MAULID MTULIA

Mbunge wa Ubungo, Saed Kebenea(CHADEMA) akanusha kujivua uanachama wa CHADEMA



Mbunge wa Ubungo, Saed Kebenea(CHADEMA) amekanusha tetesi kuwa yuko kwenye mpango wa kuhamia CCM. Amesema kinachoenezwa sasahivi ni propaganda ili kukitoa chama chake kwenye ajenda ya kuhoji mambo ya msingi.

“Sijawahi kumweleza mtu kwamba nina mpango wa kuhama CHADEMA, wala sifikirii, sijawahi kukaa na CCM na hayo mambo nayaona kwenye mitandao, kama kuna mtu ana ushahidi wa mimi kuzungumza na CCM autoe, sina sababu za kuhama, imani niliyopewa na Ubungo ni kubwa, siwezi kuichezea,”

"Kama nikutaka kuondoka CHADEMA nitaondoka kwa hiyari yangu na sio kwa kununuliwa na CCM. Nimejenga jina langu kwa miaka zaidi ya 15. Siwezi kuwasaliti wananchi wa Ubungo"

"Kuna watu kama Lowasa,Sumaye nimeshiriki kuwatoa CCM na kuwaingiza CHADEMA.Leo nikienda CCM watanielewaje"?

"Absalom Kibanda Ndiye mwanzilishi wa hizi propaganda za mimi kuhamia CCM.Nilimuonya asinichafue kwani namheshimu"

"Mbunge Godbless Lema ndiye amekuwa kinara kuzungumza haya mambo kwenye mitandao ya mimi kuhama hivyo kuleta taharuki kwenye mijadala ya wabunge wa CHADEMA". Amesema Kubenea.

KAMATI KUU YA CHADEMA KUKUTANA KWA DHARULA

TAARIFA KWA VYOMBO VYA HABARI

Kamati Kuu ya Chama cha Demokrasia na Maendeleo (CHADEMA) itakutana katika kikao cha dharura, kwa mujibu wa Katiba ya Chama, siku ya Jumatano, Desemba 6, mwaka huu, jijini Dar es Salaam.

Katika kikao hicho cha siku moja, pamoja na masuala mengine, Kamati Kuu ya Chama itapokea na kujadili agenda ya Mwenendo wa Hali ya Kisiasa nchini, kipekee kuhusu;

i.Taarifa na tathmini ya uchaguzi mdogo wa udiwani kata 43.
ii. Uchaguzi wa mdogo wa ubunge katika majimbo 3 na kata 6.

Kupitia taarifa hii pia, chama kimepokea kwa tahadhari taarifa za 'kupotea' kwa Mwandishi wa Habari wa Mwananchi Communication Ltd, Azory Gwanda.

Chama kinalaani vikali tukio hilo kwa sababu hadi sasa linadhaniwa kuwa na mazingira ya mwendelezo wa vitendo na matukio ya utekaji na mengine vya namna hiyo, ambayo yalianza kwa wanasiasa na wasanii na sasa yanaanza kujitokeza pia kwa waandishi wa habari. Tunalitaka Jeshi la Polisi nchini kuhakikisha linamaliza utata wa kutookena kwa mwandishi huyo.

Wajibu namba moja kwa serikali yoyote ile makini ni kulinda raia wake. Vyombo vya dola vyenye wajibu wa kulinda raia na mali zao, vinalo jukumu la kuchukua hatua, kupata majibu ya kumaliza sintofahamu hii inayozidi kulikumba taifa; ya watu kupotea, kutekwa, kushambuliwa kwa nia ya kuuwawa na kuokotwa kwa miili ya watu wakiwa wamekufa.

Matukio haya yakiachwa bila kutafutiwa ufumbuzi wa haraka na kuyamaliza kabisa, tutakuwa tumeruhusu dalili mbaya kabisa za tishio la usalama wa raia mmoja mmoja, mali zao na hatimae jamii nzima.

Imetolewa leo, Jumanne, Desemba 5, 2017 na;
Tumaini Makene
Mkuu wa Idara ya Habari na Mawasiliano
CHADEMA

Wednesday, November 29, 2017

Mbunge wa CHADEMA na wanachama 38 wafungwa kamba za shingo na Polisi baada ya pingu kukosekana

Mwenyekiti wa CHADEMA mkoa wa Morogoro Mh.Suzan Kiwanga, mgombea wa udiwani kata ya Sofi wilaya mpya ya Malinyi pamoja na wanachama wengine 38 wa CHADEMA wakiwa wamefikishwa katika kituo kikuu cha polisi kati, mkoani Morogoro jioni hii.

Hii ni baada ya tafrani iliyozuka baada ya mkurugenzi kujiamlia kumtangaza anayedaiwa kuwa mshindi wa pili kuwa ndiye diwani huku mshindi wa kwanza akiwa amesimama mbele yake. Walipoonyesha kutokubaliana na hilo, walipokea kipigo kutoka kwa polisi na kuwekwa mahabusu katika kituo kidogo cha Malinyi mpaka leo walipopelekwa Morogoro.

Kwa uchache wa pingu, viongozi na wanachama hao walifungwa kamba shingoni na kuunganishwa kwenye machuma ya defender za polisi.

Wakiwa na kamba, walipofika kituo kikuu cha pilisi Morogoro, waliamuriwa kuruka kichura huku wakisindikizwa kwa mateke.

Ili kuhalalisha kukamatwa kwao, viongozi wa kichama na kiserikali waliamua kuwasha moto baadhi ya majengo ya serikali ili kupata sababu ya kuwaweka ndani mbunge na wanachama. Fomu za matokeo zimechomwa moto ili kupoteza ushahidi wa mshindi. Kuelekea 2020 mambo mengi yatafanyika.

Lema: Mh Rais, kwenye Uchaguzi wa Madiwani tumeshuhudia nguvu ya dola, siamini kama ni Tanzania kwa Uchaguzi wa aina hii


Mh. Rais nakusalimu.

Uchaguzi wa marudio viti vya udiwani umekwisha, tumeshuudia nguvu ya dola kwa dhati kabisa nimeona kila kitu kilichotokea na bado siamini kama ni Tanzania kwa uchaguzi wa aina hii.

Mh. Rais, kuibiwa kura ni tofauti na kuporwa ushindi, huku kwetu Arusha huu sio wizi wa kura huu ni unyang,anyi wa kura, watu wameona na kushuudia ukatili wa ajabu wa Polisi na wasimamizi katika uchaguzi huu kwa kweli nimeumia sana kuliko wakati wote wa maisha yangu kwani ninatafakari ni wapi Nchi yangu inakwenda? Kwa namna hii wasiwasi mkubwa nilio nao ni maamuzi ya watu katika mioyo yao sioni kana kwamba watu hawa watalia tu bila kutafakari hatima yao, kwa namna nilivyoona ni dhahiri niseme kuwa Tanzania hakuna tena uchaguzi.

Matendo haya ya kwenye uchaguzi huu wa jana yameharibu fikra za watu wengi juu ya hatima ya Nchi yao na uchaguzi, vyombo vya ulinzi na usalama vimetekeleza wajibu huu wa uporaji ushindi kwa nguvu zote. Kwa mfano, huko Meru na katika kata ya Muriet, wakala aliyekataa kutoka nje wakati wa zoezi la kuhesabu kura, kwa kweli alipata shida sana, wakala wetu kijana mdogo Edwin alipigwa vibaya na wasimamizi wa Tume alipokataa kutoka nje ya kituo cha kura baada ya kulazimishwa kutoka nje. Lakini pia nilishuhudia kwa macho yangu wakala wetu kijana Nuhu akitolewa kwenye kituo na askari kwa nguvu na kudhalilishwa sana, nilitamani nishuke nimsaidie lakini niliingiwa hofu kwani nilikuwa na taarifa mbaya zilizopangwa juu ya maisha yangu.

Mh. Rais, hekima inalia sana, mioyo ya watu wote walioshuhudia huu uchaguzi ni maoni yangu kuwa sasa bila shaka wanatafakari namna nyingine ya kupata viongozi wao, kwa vile ni dhahiri kuwa Uchaguzi hauna uhakika ya kutoa nafasi ya watu kuamua. Je, unafikiri ni nini itakuwa hatma ya Tanzania baadae?

Mh. Rais, kama huu ni mkakati wa kumaliza Upinzani, pengine mkakati huu unaweza kufanikiwa, lakini Nchi haiwezi kuwa salama hata kidogo. Hapa ndipo napata mashaka hivi kweli mtoto wangu na wajukuu zako wataishi vipi katika Taifa kama hili? Ni uhakika kwamba Polisi na hata Tume waliofanikisha zoezi hili miongoni mwao baada ya jana watakuwa miongoni mwa watu ambao wanatafakari sana kuhusu hatima ya Nchi yao.

Mh. Rais, CCM kushangilia ushindi huu ni fedheha na kejeli kubwa kwa Mungu, lakini kwa vile tulifundishwa tukiwa wadogo kuwa Mungu anaishi mbinguni basi bila shaka Mungu atakuwa anaanda safari ya kuja huku kwetu Tanzania hivi karibuni. Uchaguzi huu umeongeza chuki na uadui mkubwa sana miongoni mwa jamii. Mtu anawezaje kusema anaipenda Nchi yake na kuacha mambo kama haya yatokee?

Mh. Rais, nimekusikia mara nyingi ukimtaja Mungu kinywani mwako, kama kweli ni huyu Mungu wa kweli aliye umba mbingu na Nchi ni sahihi nikisema huyu Mungu hawezi kuruhusu wala kuvumilia mambo kama haya yafanyike. Watu wamepigwa, wamekatwa mapanga na fedhea mbali mbali, hakika damu itanena tu.

Mh. Rais, ninakuomba kuchukua tahadhari sana na watu wanaosema kila kitu ndio mzee, hawa ni maadui zako na Nchi yako. Huko Zimbabwe pia walikuwepo kwa Mugabe, lakini tumeshuhudia Watu wale wale walivyokuwa wa kwanza kusema Mugabe asulubiwe.

Mh. Rais, ninao uhakika kwamba kila jambo lina wakati wake, ni busara kila nyakati ikatumiwa kwa busara, kwani nyakati ni mbegu na maandiko yanasema “Mungu hadhihakiwi, apandacho Mtu ndicho avunacho”. Sasa uchaguzi huu umekwisha kwa namna hii watu wote wakiwemo vyombo vya ulinzi na usalama waliioshiriki ktk uchaguzi huu waeona ukatili mkubwa dhidi ya haki na maamuzi ya watu katika chaguzi.

Mh. Rais, nimalizie kwa kusisitiza kuwa, hiki kilichotokea katika uchaguzi huu wa marudio ni hatari kwa usalama wa Nchi, sitatajii kuamini kwamba nitaeleweka kwa ujumbe huu, sasa mpango wa kuondoa kwenye nafasi zao viongozi mbali mbali Nchini utaendelea kwa namna na njia yoyoye ile kwani wana uhakika kuwa wakirudi kwenye uchaguzi watatangazwa washindi.

Mh. Rais, hatuwezi kuvunjika moyo hata kidogo na siku zote tunaimarika kutokana na matatizo na changamoto, tunayo fursa sasa ya kufikiri kwa dhati ni nini hatima ya Tanzania na uchaguzi. Bila shaka sasa wananchi tutaanza kudai Katiba huru kwa nguvu zote na haya ndio madai yetu ya msingi kwa wakati huu kuliko jambo lolote, najua sasa Watanzania watakuwa tiyari, bila Katiba na Tume huru Tanzania hakuna Tume ya uchaguzi bali kuna tume ya uporaji wa uchaguzi.

Mh. Rais, tafadhali naomba utafakari maneno haya aliyosema mfalme Sulemani kutoka katika kitabu cha Mithali. "Kabla ya uharibifu moyo wa mwanadamu hujivuna; Na kabla ya heshima hutangulia unyenyekevu"

Mungu akubariki sana.
ONLY TIME WILL TELL.

Godbless J Lema (MB)